ടെഹ്റാന്‍: അയത്തുള്ള ഖമേനിയുടെ പിന്‍ഗാമി: മകന്‍ മുജ്തബ ഖമേനിയെ തിരഞ്ഞെടുത്തതായി റിപ്പോര്‍ട്ടുകള്‍
ടെഹ്റാന്‍: ഇറാന്റെ പരമോന്നത നേതാവ് അയത്തുള്ള അലി ഖമേനിയുടെ പിന്‍ഗാമിയായി അദ്ദേഹത്തിന്റെ രണ്ടാമത്തെ മകന്‍ മുജ്തബ ഖമേനിയെ (56) തിരഞ്ഞെടുത്തതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. ഇറാന്റെ പരമോന്നത സമിതി അതീവ രഹസ്യമായി മുജ്തബയെ പിന്‍ഗാമിയായി നിശ്ചയിച്ചതായാണ് വിവരം. ഇസ്രായേലി മാധ്യമങ്ങളും ഈ വാര്‍ത്ത റിപ്പോര്‍ട്ട് ചെയ്തിട്ടുണ്ട്.

ഇസ്ളാമിക് റെവല്യൂഷണറി ഗാര്‍ഡ് കോര്‍പ്സിന്റെ (IRGC) ശക്തമായ സമ്മര്‍ദ്ദത്തെത്തുടര്‍ന്നാണ് വിദഗ്ധ സമിതി മുജ്തബയെ തിരഞ്ഞെടുത്തതെന്ന് സൂചനയുണ്ട്. ഖമേനിയുടെ ആരോഗ്യസ്ഥിതി മോശമാണെന്ന വാര്‍ത്തകള്‍ക്കിടെയാണ് ഈ നീക്കം. നിയമനം സംബന്ധിച്ച ഔദ്യോഗിക പ്രഖ്യാപനം ഉടന്‍ ഉണ്ടായേക്കുമെന്നാണ് വിവരം.

പിതാവിനേക്കാള്‍ കടുത്ത നിലപാടുകാരന്‍
പിതാവായ അലി ഖമേനിയേക്കാള്‍ തീവ്രമായ നിലപാടുകള്‍ സ്വീകരിക്കുന്ന വ്യക്തിയായാണ് മുജ്തബ ഖമേനിയെ ഇസ്രായേല്‍ മാധ്യമങ്ങള്‍ വിശേഷിപ്പിക്കുന്നത്.

ഭരണപരിചയം: വര്‍ഷങ്ങളായി പിതാവിന്റെ ഓഫീസിന്റെ പ്രവര്‍ത്തനങ്ങളില്‍ നിര്‍ണ്ണായക സ്വാധീനം മുജ്തബയ്ക്കുണ്ട്.
സൈനിക ബന്ധം: റെവല്യൂഷണറി ഗാര്‍ഡിലെ ഉന്നത ഉദ്യോഗസ്ഥരുമായി ഇദ്ദേഹം അടുത്ത ബന്ധം പുലര്‍ത്തുന്നു.

വിവാദങ്ങള്‍: ഇറാനിലെ സര്‍ക്കാര്‍ വിരുദ്ധ പ്രക്ഷോഭങ്ങളെ അടിച്ചമര്‍ത്തുന്നതിന് പിന്നില്‍ മുജ്തബയുടെ ബുദ്ധി കേന്ദ്രമാണെന്ന് ആരോപണമുണ്ട്. ലണ്ടനില്‍ ആഡംബര സ്വത്തുക്കളും സ്വിറ്റ്സര്‍ലന്‍ഡില്‍ വന്‍ നിക്ഷേപങ്ങളും ഇദ്ദേഹത്തിനുണ്ടെന്ന് പാശ്ചാത്യ മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ടെങ്കിലും ഇറാന്‍ ഇത് സ്ഥിരീകരിച്ചിട്ടില്ല.

സൈനിക സേവനവും പശ്ചാത്തലവും
അയത്തുള്ള അലി ഖമേനിയുടെ ആറ് മക്കളില്‍ രണ്ടാമനാണ് മുജ്തബ. പതിനേഴാം വയസ്സില്‍ തന്നെ ഇസ്ളാമിക് റെവല്യൂഷണറി ഗാര്‍ഡില്‍ ചേര്‍ന്ന അദ്ദേഹം ഇഞ്ചോടിഞ്ച് പോരാട്ടം നടന്ന ഇറാഖ്~ഇറാന്‍ യുദ്ധത്തില്‍ പങ്കാളിയായിട്ടുണ്ട്. മിലിട്ടറി ഇന്റലിജന്‍സിലും സുരക്ഷാ കാര്യങ്ങളിലും മുജ്തബയ്ക്ക് വലിയ സ്വാധീനമുണ്ട്.

നേരത്തെ 'ന്യൂയോര്‍ക്ക് ടൈംസ്' ഉള്‍പ്പെടെയുള്ള പ്രമുഖ മാധ്യമങ്ങള്‍ മുജ്തബ ഖമേനി പിന്‍ഗാമിയാകാന്‍ സാധ്യതയുണ്ടെന്ന് റിപ്പോര്‍ട്ട് ചെയ്തിരുന്നു. ഇറാന്റെ രാഷ്ട്രീയ ഭാവിയെ സംബന്ധിച്ചിടത്തോളം അതീവ നിര്‍ണ്ണായകമാണ് ഈ പുതിയ മാറ്റം.